Comme laron[1] d’iluec eschape,
Et cil lest corre, si le frape,
Mès ne vaut rien que[2] bien se tient.
« Por nient, » fet ele, « ne vous crient,[3]
Il n’avra garde à ceste empointe[4],
Se estiiez encor plus[5] cointe
Que vous n’estes de la moitié ;
Por ce que vous estes pingnié,[6]
Et je sui encontre ce[7] blonde.
Por qoi[8] passastes vous l’esponde
Quant je me dormoie en mon lit ?
Cuidiez vous de[9] vostre grand vit
Avoir moi si estoutoïe ?
Je sui encor saine et haitie
Plus que vous au mien escient ;
Se contre vous[10] ne me desfent,
Dont sui je pire que ribaude :
Vous en avrez ja une chaude.
Or fetes tost, si alez jus,
Je revoeil[11] ore aler desus ;
Ce n’est pas, ce m’est avis, honte
Quant homme faut, se fame monte. »
Ainsi torna son songea bien.
Autressi face à moi le mien,
Et à ces dames qui ci sont
Les premiers qu’eles troveront[12]
Soit autretel comme cil fu :[13]
Mout lor seroit bien avenu.
- ↑ 51 — * laron. A, baron. — B, Car n’i vialt pas qui li eschape.
- ↑ 53 — B, Mais la meschine.
- ↑ 54 — B, C’est por noiant, il ne vos crient.
- ↑ 55 — B, ceste pointe.
- ↑ 56 — B, Se vous estoiez or.
- ↑ 58 — B, ce estes bien paignié.
- ↑ 59 — ce. B, assez.
- ↑ 60 — B, Par cui.
- ↑ 62 — de. B, por.
- ↑ 66 — B, Se je de vos.
- ↑ 70 — B, Car je revoil.
- ↑ 76 — B, Lo premier que il songeront.
- ↑ 77 — B, Soit autresi come ce fu.