vous iamais rien si rabaissé, si changé, si confus ? Il y faut prouuoir de meilleure heure : et cette nonchalance bestiale, quand elle pourroit loger en la teste d’vn homme d’entendement, ce que ie trouue entièrement impossible, nous vend trop cher ses denrées. Si c’estoit ennemy qui se peust euiter, ie conseillerois d’emprunter les larmes de la coüardise : mais puis qu’il ne se peut ; puis qu’il vous attrappe fuyant et poltron aussi bien qu’honeste homme,
Nempe et fugacem persequitur virum,
Nec pareil imbellis iuuentæ
Poplitibus, timidoque tergo.
et que nulle trampe de cuirasse vous couure,
Ille licet ferro cautus se condat in ære,
Mors tamen inclusum protrahet inde caput.
aprenons à le soustenir de pied ferme, et à le combatre :Et
pour commencer à luy oster son plus grand aduantage contre
nous, prenons voye toute contraire à la commune. Ostons luy l’estrangeté,
pratiquons le, accoustumons le, n’ayons rien si souuent
en la teste que la mort : à tous instans représentons la à nostre
imagination et en tous visages. Au broncher d’vn cheual, à la cheute
d’vne tuille, à la moindre piqueure d’espeingle, remâchons soudain,
Et bien quand ce seroit la mort mesme ? et là dessus, roidissons
nous, et nous efforçons. Parmy les testes et la ioye, ayons
tousiours ce refrein de la souuenance de nostre condition, et ne
nous laissons pas si fort emporter au plaisir, que par fois il ne
nous repasse en la mémoire, en combien de sortes cette nostre allégresse
est en butte à la mort, et de combien de prinses elle la
menasse. Ainsi faisoient les Egyptiens, qui au milieu de leurs
festins et parmy leur meilleure chère, faisoient apporter l’Anatomie
sèche d’vn homme, pour seruir d’auertissement aux conuiez.
Omnem crede diem tibi diluxisse supremum,
Grata superueniet, quæ non sperabitur hora.
Il est incertain où la mort nous attende, attendons la par tout. La préméditation de la mort, est préméditation de la liberté. Qui a apris à mourir, il a desapris à seruir. Il n’y a rien de mal en la vie, pour celuy qui a bien comprins, que la priuation de la vie n’est pas mal. Le sçauoir mourir nous afranchit de toute subiection et contraincte. Paulus Æmylius respondit à celuy, que ce misérable Roy de Macédoine son prisonnier luy enuoyoit, pour le prier de ne le mener pas en son triomphe. Qu’il en face la requeste à soy mesme.À la vérité en toutes choses si nature ne preste vn peu, il est mal-aysé que l’art et l’industrie aillent guiere auant. Ie suis de moy-mesme non melancholique, mais songecreux : il n’est rien dequoy ie me soye des tousiours plus entretenu que