de la cause générale de son parly, et qu’aucuns luy auoient persuadé que ce seroit vue exécution pleine de pieté, d’extirper en quelque manière que ce fust, vn si puissant ennemy de leur religion. Or, suiuit ce Prince, ie vous veux montrer, combien la religion que ie tiens est plus douce, que celle dequoy vous faictes profession. La vostre vous a conseillé de me tuer sans m’ouir, n’ayant receu de moy aucune offence ; et la mienne me commande que ie vous pardonne, tout conuaincu que vous estes de m’auoir voulu tuer sans raison. Allez vous on, retirez vous, que ie ne vous voye plus icy : et si vous estes sage, prenez doresnauant en voz entreprises des conseillers plus gens de bien que ceux là.L’empereur Auguste estant en la Gaule, reçeut certain auertissement d’vne coniuration que luy brassoit L. Cinna : il délibéra de s’en venger, et manda pour cet effect au lendemain le conseil de ses amis : mais la nuict d’entre-deux il la passa auec grande inquiétude, considérant qu’il auoit à taire mourir un ieune homme de bonne maisons et neueu du grand Pompeius : et produisoit en se pleignant plusieurs diuers discours. Quoy donq, faisoit-il, sera-il dict que ie demeureray en crainte et en alarme, et que ie lairray mon meurtrier se pourmener cependant à son ayse ? S’en ira-il quitte, ayant assailly ma teste, que i’ay sauuée de tant de guerres ciuiles, de tant de batailles, par mer et par terre ? et après auoir estably la paix vniuerselle du monde, sera-il absouz, ayant délibéré non de me meurtrir seulement, mais de me sacrifier ? Car la coniuration estoit faicte de le tuer, comme il feroit quelque sacrifice. Apres cela s’estant tenu coy quelque espace de temps, il recommençoit d’vne voix plus forte, et s’en prenoit à soy-mesme : Pourquoy vis tu, s’il importe à tant de gens que tu meures ? n’y aura-il point de fin à tes vengeances et à tes cruautez ? Ta vie vaut-elle que tant de dommage se face pour la conseruer ? Liuia sa femme le sentant en ces angoisses : Et les conseils des femmes y seront-ils receuz, luy dit elle ? Fais ce que font les médecins, quand les receptes accoustumees ne peuuent seruir, ils en essayent de contraires. Par seuerité tu n’as iusques à cette heure rien profité : Lepidus a suiuy Sauidienus, Murena Lepidus, Caepio Murena, Egnatius Gaepio. Commence à expérimenter comment te succéderont la douceur et la clémence. Cinna est conuaincu, pardonne luy ; de te nuire désormais, il ne pourra, et profitera à ta gloire. Auguste fut bien ayse d’auoir trouué vn aduocat de son humeur, et ayant remercié sa femme et contremandé ses amis, qu’il auoit assignez au Conseil, commanda qu’on fist venir à luy Cinna tout seul. Et ayant fait sortir tout le monde de sa chambre, et fait donner vn siège à Cinna, il luy parla en cette manière : En premier
