vne si viue appréhension de la béatitude éternelle et céleste, qu’elle solicita son mary auec extrême instance, d’en faire autant pour elle. Et Dieu à leurs prières communes, l’ayant retirée à soy, bien tost après, ce fut vne mort embrassée auec singulier contentement commun.
CHAPITRE XXXIII.
’inconstance du bransle diuers de la fortune, fait qu’elle nous
doiue présenter toute espèce de visages. Y a il action de iustice
plus expresse que celle cy ? Le Duc de Valentinois ayant résolu
d’empoisonner Adrian Cardinal de Cornete, chez qui le Pape
Alexandre sixiesme son père, et luy alloyent soupper au Vatican :
enuoya deuant, quelque bouteille de vin empoisonné, et commanda
au sommelier qu’il la gardast bien soigneusement : le Pape y estant
arriué auant le fils, et ayant demandé à boire, ce sommelier, qui
pensoit ce vin ne luy auoir esté recommandé que pour sa bonté, en
seruit au Pape, et le Duc mesme y arriuant sur le point de la collation,
et se fiant qu’on n’auroit pas touché à sa bouteille, en prit
à son tour ; en manière que le Père en mourut soudain, et le
fils après auoir esté longuement tourmenté de maladie, fut reserué
à vn’autre pire fortune.Quelquefois il semble à point nommé
qu’elle se ioüe à nous. Le Seigneur d’Estree, lors guidon de Monsieur
de Vandosme, et le Seigneur de Liques, Lieutenant de la compagnie
du Duc d’Ascot, estans tous deux seruiteurs de la sœur du Sieur de
Foungueselles, quoi que de diuers partis (comme il adulent aux
voisins de la frontière) le Sieur de Licques l’emporta : mais le
mesme iour des nopces, et qui pis est, auant le coucher, le marié
ayant enuie de rompre vn bois en faueur de sa nouuelle espouse,
sortit à l’escarmouche près de S. Omer, où le Sieur d’Estree se
trouuant le plus fort, le feit son prisonnier : et pour faire valoir
son aduantage, encore fallut-il que la Damoiselle,
