mon père) adioustons d’vne autre pièce, que le Capitaine Martin du Bellay recite, au voyage de Luxembourg, auoir veu les gelées si aspres, que le vin de la munition se coupoit à coups de hache et de coignee, se debitoit aux soldats par poix, et qu’ils l’emportoient dans des panniers : et Ouide,
Nudâque consistunt, formam seruanlia lestée,
Vina ; nec hausta meri, sed data frusta, bibunt.
Les gelées sont si aspres en l’emboucheure des Palus Mæotides,
qu’en la mesme place où le Lieutenant de Mithridates auoit liuré
bataille aux ennemis à pied sec, et les y auoit desfaicts, l’esté venu,
il y gaigna contre eux encore vne bataille naualle. Les Romains
souffrirent grand desaduantage au combat qu’ils curent contre les
Carthaginois près de Plaisance, de ce qu’ils allèrent à la charge, le
sang figé, et les membres contreints de froid : là où Hannibal auoit
faict espandre du feu par tout son ost, pour eschaufer ses soldats :
et distribuer de l’huyle par les bandes, afin que s’oignants, ils
rendissent leurs nerfs plus souples et desgourdis, et encroustassent
les pores contre les coups de l’air et du vent gelé, qui couroit
lors. La retraitte des Grecs, de Babylone en leurs pais, est fameuse
des difficultez et mesaises, qu’ils curent à surmonter. Cette cy en
fut, qu’accueillis aux montaignes d’Arménie d’vn horrible rauage
de neiges, ils en perdirent la cognoissance du pais et des chemins :
et en estants assiégés tout court, furent vn iour et vne nuict, sans
boire et sans manger, la plus part de leurs bestes mortes : d’entre
eux plusieurs morts, plusieurs aueugles du coup du grésil, et lueur
de la neige : plusieurs estropiés par les extremitez : plusieurs roides
transis et immobiles de froid, ayants encore le sens entier. Alexandre
veit vne nation en laquelle on enterre les arbres fruitiers en
hyuer pour les défendre de la gelée : et nous en pouuons aussi voir.
Sur le subiect de vestir, le Roy de la Mexique changeoit quatre fois par iour d’accoustremens, iamais ne les reiteroit, employant sa desferre à ses continuelles liberalitez et recompenses : comme aussi ny pot, ny plat, ny vtensile de sa cuisine, et de sa table, ne luy estoient seruis à deux fois.
