ils ne s’aduisent pas, que cette certitude, sur laquelle ils se fondent, n’est guère moins incertaine et hazardeuse que le hazard mesme. Ie voy d’aussi près la misère au delà de deux mille escus de rente, que si elle estoit tout contre moy. Car outre ce que le sort a dequoy ouurir cent brèches à la pauureté au trauers de nos richesses, n’y ayant souuent nul moyen entre la suprême et infime fortune,
et enuoyer cul sur pointe toutes nos deffences et leuées ; ie trouue que par diuerses causes, l’indigence se voit autant ordinairement logée chez ceux qui ont des biens, que chez ceux qui n’en ont point : et qu’à l’auanture est elle aucunement moins incommode, quand elle est seule, que quand elle se rencontre en compagnie des richesses. Elles viennent plus de l’ordre, que de la recepte : Faber est suæ quisque fortunæ. Et me semble plus misérable vn riche malaisé, nécessiteux, affaireux, que celuy qui est simplement pauure. In diuitiis inopes, quod genus egestatis grauissimum est. Les plus grands Princes et plus riches, sont par pauureté et disette poussez ordinairement à l’extrême nécessité. Car en est-il de plus extrême, que d’en deuenir tyrans, et iniustes vsurpateurs des biens de leurs subiets ?Ma seconde forme, ç’a esté d’auoir de l’argent. À quoy m’estant prins, i’en fis bien tost des reserues notables selon ma condition : n’estimant pas que ce fust auoir, sinon autant qu’on possède outre sa despence ordinaire : ny qu’on se puisse fier du bien, qui est encore en espérance de recepte, pour claire qu’elle soit. Car quoy, disoy-ie, si i’estois surpris d’vn tel, ou d’vn tel accident ? Et à la suitte de ces vaines et vitieuses imaginations, i’allois faisant l’ingénieux à prouuoir par cette superflue reserue à tous inconueniens. Et sçauois encore respondre à celuy qui m’alleguoit que le nombre des inconueniens estoit trop inflny ; que si ce n’estoit à tous, c’estoit à aucuns et plusieurs. Cela ne se passoit pas sans pénible sollicitude. I’en faisoy vn secret : et moy, qui ose tant dire de moy, ne parloy de mon argent, qu’en mensonge : comme font les autres, qui s’appauurissent riches, s’enrichissent pauures : et dispensent leur conscience de tesmoigner iamais sincèrement de ce qu’ils ont. Ridicule et honteuse prudence. Allois-ie
