par le second, auec merueilleux fruit, et confirmation : comme à l’extrême limite de la chrestienne intelligence : et iouyr de leur victoire auec consolation, action de grâces, reformation de mœurs, et grande modestie. Et en ce rang n’entens-ie pas loger ces autres, qui pour se purger du soupçon de leur erreur passé, et pour nous asseurer d’eux, se rendent extrêmes, indiscrets, et iniustes, à la conduicte de nostre cause, et la tachent d’infinis reproches de violence. Les païsants simples, sont honijestes gents : et honnestes gents les Philosophes : ou, selon que nostre temps les nomme, des natures fortes et claires, enrichies d’vne large instruction de sciences vtiles. Les mestis, qui ont dédaigné le premier siège de l’ignorance des lettres, et n’ont peu ioindre l’autre, le cul entre deux selles (desquels ie suis, et tant d’autres) sont dangereux, ineptes, importuns : ceux-cy troublent le monde. Pourtant de ma part, ie me recule tant que ie puis, dans le premier et naturel siège, d’où ie me suis pour néant essayé de partir.La poësie populaire et purement naturelle, a des naïuetés et grâces, par où elle se compare à la principale beauté de la poésie parfaitte selon l’art : comme il se void es villanelles de Gascongne et aux chansons, qu’on nous rapporte des nations qui n’ont cognoissance d’aucune science, ny mesme d’escriture. La poésie médiocre, qui s’arreste entre deux, est desdaignée, sans honneur, et sans prix.Mais par ce qu’après que le pas a esté ouuert à l’esprit, i’ay trouué, comme il adulent ordinairement, que nous auions pris pour vn exercice malaisé et d’vn rare subiect, ce qui ne l’est aucunement, et qu’après que nostre inuention a esté eschauffée, elle descouure vn nombre infiny de pareils exemples, ie n’en adiousteray que cettuy-cy : que si ces Essays estoient dignes, qu’on en iugeast, il en pourroit aduenir à mon aduis, qu’ils ne plairoient guère aux esprits communs et vulgaires, ny guère aux singuliers et excellons : ceux-là ny entendroient pas assez, ceux-cy y entendroient trop : ils pourroient viuoter en la moyenne region.
