trouue en soy, voire et en son iugement mesme, cette volubilité et discordance. Ie n’ay rien à dire de moy, entièrement, simplement, et solidement, sans confusion et sans meslange, ny en vn mot. Distinguo, est le plus vniuersel membre de ma Logique.Encore que ie sois tousiours d’aduis de dire du bien le bien, di d’interpréter plustost en bonne part les choses qui le peuuent estre, si est-ce que l’estrangeté de nostre condition, porte que nous soyons souuent par le vice mesme poussez à bien faire, si le bien faire ne se iugeoit par la seule intention. Parquoy vn fait courageux ne doit pas conclurre vn homme vaillant : celuy qui le seroit bien à poinct, il le seroit tousiours, et à toutes occasions. Si c’estoit vne habitude de vertu, et non vne saillie, elle rendroit vn homme pareillement résolu à tous accidens : tel seul, qu’en compagnie : tel en camp clos, qu’en vne bataille : car quoy qu’on die, il n’y a pas autre vaillance sur le paué et autre au camp. Aussi courageusement porteroit il vne maladie en son lict, qu’vne blessure au camp : et ne craindroit non plus la mort en sa maison qu’en vn assaut. Nous ne verrions pas vn mesme homme, donner dans la bresche d’vne braue asseurance, et se tourmenter après, comme vne femme, de la perte d’vn procez ou d’vn fils. Quand estant lasche à l’infamie, il est ferme à la pauureté : quand estant mol contre les rasoirs des barbiers, il se trouue roide contre les espées des aduersaires : l’action est louable, non pas l’homme. Plusieurs Grecs, dit Cicero, ne peuuent veoir les ennemis, et se trouuent constants aux maladies. Les Cimbres et Celtiberiens tout au rebours. Nihil enim potest esse æquabile, quod non à certa ratione proficiscatur.Il n’est point de vaillance plus extrême en son espèce, que celle d’Alexandre : mais elle n’est qu’en espèce, ny assez pleine par tout, et vniuerselle. Toute incomparable qu’elle est, si a elle encores ses taches. Qui faict que nous le voyons se troubler si esperduement aux plus légers soupçons qu’il prent des machinations des siens contre sa vie : et se porter en cette recherche, d’vne si véhémente et indiscrète iniustice, et d’vne crainte qui subuertit sa raison naturelle. La superstition aussi dequoy il estoit si fort attaint, porte quelque image de pusillanimité. Et l’excès de la pénitence, qu’il fit, du meurtre de Clytus, est aussi tesmoignage de l’inégalité de son courage. Nostre faict ce ne sont que pièces rap-
