de surprise se tirent de cette praticque : et n’est heure, disons nous, où vn chef doiue auoir plus l’œil au guet, que celle des parlemens et traités d’accord. Et pour cette cause, c’est vne règle en la bouche de tous les hommes de guerre de nostre temps, Qu’il ne faut iamais que le Gouuerneur en vne place assiégée sorte luy mesmes pour parlementer.Du temps de nos pères cela fut reproché aux Seigneurs de Montmord et de l’Assigni, deffendans Mouson contre le Comte de Nansau. Mais aussi à ce conte, cèluy la seroit excusable, qui sortiroit en telle façon, que la seureté et l’audantage demeurast de son costé : comme fit en la ville de Regge, le Comte Guy de Rangon (s’il en faut croire du Bellay, car Guicciardin dit que ce fut luy mesmes) lors que le Seigneur de l’Escut s’en approcha pour parlementer : car il abandonna de si peu son fort, qu’vn trouble s’estant esmeu pendant ce parlement, non seulement Monsieur de l’Escut et sa trouppe, qui estoit approchée auec luy, se trouua le plus foible, de façon qu’Alexandre Triuulce y fut tué, mais luy mesme fut contrainct, pour le plus seur, de suiure le Comte, et se ietter sur sa foy à l’abri des coups dans la ville.Eumenes en la ville de Nora pressé par Antigonus qui l’assiegeoit, de sortir pour luy parler, alléguant que c’estoit raison qu’il vinst deuers luy, attendu qu’il estoit le plus grand et le plus fort : après auoir faict cette noble responce : le n’estimeray iamais homme plus grand que moy, tant que i’auray mon espee en ma puissance, n’y consentit, qu’Antigonus ne luy eust donné Ptolemaeus son propre nepueu ostage, comme il demandoit.Si est ce qu’encores en y a-il, qui se sont tresbien trouuez de sortir sur la parole de l’assaillant : tesmoing Henry de Vaux, Cheualier Champenois, lequel estant assiégé dans le Chasteau de Commercy par les Anglois, et Barthélémy de Bonnes, qui commandoit au siège, ayant par dehors faict sapper la plus part du Chasteau, si qu’il ne restoit que le feu pour accabler les assiégez sous les ruines, somma ledit Henry de sortir à parlementer pour son profict, comme il fit luy quatriesme ; et son euidente ruyne luy ayant esté montrée à l’œil, il s’en sentit singulièrement obligé à l’ennemy : à la discrétion duquel après qu’il se fut rendu et sa trouppe, le feu estant mis à la mine, les estansons de bois venus à faillir, le Chasteau fut emporté de fons en comble.
Ie me fie aysement à la foy d’autruy : mais mal-aysement le
