alléguant quelques raisons : l’Ambassadeur répliqua mal à propos, qu’il les auoit aussi considérées de sa part, et les auoit bien dictes au Pape. De cette parole si esloignée de sa proposition, qui estoit de le pousser incontinent à la guerre, le Roy d’Angleterre print le premier argument de ce qu’il trouua depuis par effect, que cet Ambassadeur, de son intention particulière pendoit du costé de France, et en ayant aduerty son maistre, ses biens furent confisquez, et ne tint à guère qu’il n’en perdist la vie.
CHAPITRE X.
nc ne furent à tous toutes grâces données.
Aussi voyons nous qu’au don d’éloquence, les vns ont la facilité et la promptitude, et ce qu’on dit, le boutehors si aisé, qu’à chasque bout de champ ils sont prests : les autres plus tardifs ne parlent iamais rien qu’elabouré et premedité.Comme on donne des règles aux dames de prendre les ieux et les exercices du corps, selon l’auantage de ce qu’elles ont le plus beau. Si i’auois à conseiller de mesmes, en ces deux diuers aduantages de l’éloquence, de laquelle il semble en nostre siècle, que les Prescheurs et les Aduocats facent principalle profession, le tardif seroit mieux Prescheur, ce me semble, et l’autre mieux Aduocat : par ce que la charge de celuy-Ià luy donne autant qu’il luy plaist de loisir pour se préparer ; et puis sa carrière se passe d’vn fil et d’vne suite, sans interruption : là où les commoditez de l’Aduocat le pressent à toute heure de se mettre en lice : et les responces improuueuës de sa partie aduerse, le reiettent de son branle, où il luy faut sur le champ prendre nouueau party.Si est-ce qu’à l’entreueuë du Pape Clément et du Roy François à Marseille, il aduint tout au rebours, que Monsieur Poyet, homme toute sa vie nourry au barreau, en grande réputation, ayant charge de faire la harangue au Pape, et l’ayant de longue main pourpensee, voire, à ce qu’on dict, apportée de Paris toute preste, le iour mesme qu’elle deuoit estre prononcée, le Pape se craignant qu’on luy tinst propos qui peust offenser les Ambassadeurs des autres Princes qui estoyent autour de luy, manda au Roy l’argument qui luy sembloit estre le plus propre au temps et au lieu,
