Nous sommes de grands fols. Il a passé sa vie en oisiueté, disonsnous ie n’ay rien faict d’auiourd’huy. Quoy ? auez-vous pas vescu ? C’est non seulement la fondamentale, mais la plus illustre de vos occupations. Si on m’eust mis au propre des grands maniements, i’eusse montré ce que ie sçauoy faire. Auez vous sceu mediter et manier vostre vie ? vous auez faict la plus grande besoigne de toutes. Pour se montrer et exploicter, nature n’a que faire de fortune. Elle se montre egallement en tous estages : et derriere, comme sans rideau. Auez-vous sceu composer vos mœurs : vous auez bien plus faict que celuy qui a composé des liures. Auez-vous sceu prendre du repos : vous auez plus faict, que celuy qui a pris des Empires et des villes.Le glorieux chef-d’œuure de l’homme, c’est viure à propos. Toutes autres choses regner, thesauriser, bastir, n’en sont qu’appendicules et adminicules, pour le plus. Ie prens plaisir de voir vn general d’armée au pied d’vne breche qu’il veut tantost attaquer, se prestant tout entier et deliure, à son disner, au deuis, entre ses amis. Et Brutus, ayant le ciel et la terre conspirez à l’encontre de luy, et de la liberté Romaine, desrober à ses rondes, quelque heure de nuict, pour lire et breueter Polybe en toute securité. C’est aux petites ames enseuelies du poix des affaires, de ne s’en sçauoir purement desmesler : de ne les sçauoir et laisser et reprendre.
O fortes peiorȧque passi
Mecum sæpe viri, nunc vino pellite curas,
Cras ingens iterabimus æquor.
Soit par gosserie, soit à certes, que le vin theologal et Sorbonique est passé en prouerbe, et leurs festins : ie trouue que c’est raison, qu’ils en disnent d’autant plus conmodément et plaisamment, qu’ils ont vtilement et sericusement employé la matinée à l’exercice de leur eschole. La conscience d’auoir bien dispensé les autres heures, est vn iuste et sauoureux condiment des tables. Ainsin ont vescu les sages. Et cette inimitable contention à la vertu, qui nous estonne en l’vn et l’autre Caton, cette humeur seuere iusques à l’importunité, s’est ainsi mollement submise, et pleue aux loix de l’humaine condition, et de Venus et de Bacchus. Suiuant les preceptes de leur secte, qui demandent le sage parfaict, autant expert et entendu à l’vsage des voluptez qu’en tout autre deuoir de la vie. Cui cor sapiat, ei et sapiat palatus.Le relaschement et facilité
