Le texte de cette page a été corrigé et est conforme au fac-similé.
XII
Dimanche à soai, la veille di dépa di Atipa, pou placè, kou li fini soupé conça, li té ca limein so pipe, pou soti prend lai moceau ; Totie entré côté li.
— Mo bin content di wai to, dit Atipa. Dipis mo Cayenne la, mo pas jain contré qué to ; mo té crai, meinme, mo té ké pati, sans wai to.
— Mo pas té Cayenne, réponne Totie. To savé, landans nous mékié la, nous pou ca rété, en ville, longtemps. Mo té la placè Nationnal, à Kourou. Kou mo rivé conça, òte jou, mo allé, encò, fait oune campangne, la Comté, qué Bouka ; nous allé meinnein vive la placè Bief.
— Yé dit mo li gain l’ò beaucoup, la Nationnal la, dit Atipa ?
— Pas palé, frè ! réponne Totie ; Çaïde yé
