Le texte de cette page a été corrigé et est conforme au fac-similé.
V
Lendimain mardi, à nèvhè, Atipa filé tout draite, bò di Sazi, pou waii Neinanmoin. Li savé lò Neinanmoin ca pêché nègue yé la conça, pou vote, abò la, li ca metté so tranmail.
Moune Cayenne, kou Neinanmoin yé la conça, mo pas beinsoin fait zòte yé potré, zòte connaite yé assez.
Qui dit, qui fait. Li trouvé Neinanmoin là-sous, ca fait oune discou, baille oune nègue Còmonbo. Lò nègue la pati, Atipa allé invité li, à prend oune coup l’sec, quichose li pou ca roufisé. Yé allé prend oune tabe, et pis yé coumencé causé :
— Mo té savé, dit Atipa, mo té wa trouvé ou ici la ; a ou bireau. Yé dit mo, nous ké voté simainne, ca vini, et ou ca travaille toujou, peu pitit mouché la. Mo trouvé ça zaffai la pas drait ditout.
