Scène DEVXIEME.
Vn Eſclaue portant vn vaze d’eau luſtrale, dont Thymœtes iette vne rosée ſur Endymion auec vne profonde reuerence.
Ndymion reçois ce premier appareil,
Puiſque tu paroiſtras comme vn autre ſoleil,
Lors que nous le verrons au bout de ſa carriere
Cacher deſſous la mer ſa celeſte lumiere ;
Ainſi que l’on verra cet autre Aſtre qui luit,
Pour chaſſer en tous lieux les ombres de la nuit ;
Enfin cette Deeſſe, & ſi grande, & ſi belle,
Dont on fait auiourd’huy la feſte ſolemnelle,
Deſire que bien-toſt tu luy ſois immolé,
Sçachant que pour les Dieux ton cœur eſt ſi zelé :
Les Oracles l’ont dit, & la Deeſſe meſme
Teſmoigne d’en avoir vn deſir tout extreme.
Enfin Endymion, tu vois bien que les Dieux
Te vont faire ſans doute habitant dans les Cieux :
L’on voit bien que la terre eſt du tout incapable
De porter ſi long-temps vn homme incomparable :
Les Dieux t’en retirant, pour te favoriſer,
Font voir qu’ils n’ont deſſein qu’à t’immortalizer.
