en attendre des conſolations, des conſeils, & des ſecours dans tous les beſoins de la vie ? Penſe-t’il nous avoir bien rejouïs de nous dire qu’il doute ſi noſtre ame eſt autre choſe qu’un peu de vent & de fumée, & encore de nous le dire d’un ton de voix fier & content ? Eſt-ce donc une choſe à dire gayement ; & n’eſt-ce pas une choſe à dire au contraire triſtement, comme la choſe du monde la plus triſte ?
S’ils y penſoient ſerieuſement ils verroient que cela eſt ſi mal pris, ſi contraire au bon ſens, ſi oppoſé à l’honneſteté, & ſi éloigné en toute maniere de ce bon air qu’ils cherchent, que rien n’eſt plus capable de leur attirer le meſpris & l’averſion des hommes, & de les faire paſſer pour des perſonnes ſans eſprit & ſans jugement. Et en effet ſi on leur fait rendre compte de leurs ſentimens & des raiſons qu’ils ont de douter de la Religion, ils diront des choſes ſi foibles & ſi baſſes qu’ils perſuaderoient plutoſt du contraire. C’eſtoit ce que
