247. Toldres Lascres envoia le plus de sa gent à tote sa force en la terre de Nichomie. Et la gent Tyerris de Los, qui avoient fermé le mostier Sainte Sophie, et cil qui estoient dedenz, mandérent à lor seignor et l’Empereor que il le secorust, que se il n’avoient secors il ne se porroient tenir, et ensor que tot si n’avoient point de viande. Par fine destréce convint l’empereor Henri, et sa gent, que il laissa la voie d’aller à Andrenople, et que il passast le braz Sain George devers la Turquie à tant de gent com il pot avoir por secore Nichomie. Et quant la gent Toldre Lascres l’oïrent que il venoit, si revuiderent la terre, si se traistrent arriére vers Nike la grant. Et quant l’Emperéres le sot, si prist son conseil, et fû li conseil tels : que Tyerris de Los li seneschaus de Romenie remanroit à Nichomie, à toz ses chevaliers et à toz ses serjanz, por garder la terre, et Machaires de Sainte Manehalt al Caracas, et Guillelme del Perchoit en Esquille, et cil deffendroient la terre endroit als.
248. Lors s’en r’alla l’emperéres Henri en Constantinople al remainant de sa gent, et ot empris de rechief d’aller à movoir por r’aller vers Andrenople ; et endementiers qu’il atorna son oirre, Tyerris de Los le seneschaus, qui ére à Nichomie, et Guillelme del Perchoi à totes lor genz allérent forer un jor. Et la gent Toldre Lascres le sorent, si les sospristrent et lor corurent sus. Si furent mult grant gent, et cil furent pou. Si comença li estors et la mellée : ne demora mie longuement que li pou ne porent endurer le trop. Mult le fist bien Tyerris de Los et sa gent, et fû abatuz deux foiz, et par force le remontérent sa
