251. Lors s’en repaira l’emperéres Henris en Constantinople, et emprist à aller vers Andrenople à tant còm il porroit de gent avoir. Et assembla s’ost à Salembrie : et fu jà tant del tens passé que il fû aprés la feste Sainz Johan en juing. Et chevaucha tant que il vint à Andrenople, et se herberja és prées devant la ville. El cil de la cité qui mult l’avoient desiré, issirent fors à procession, si le virent mult volentiers, et tuit li Grieu de la terre furent venu. Il ne séjorna que un jour devant la ville, tant qu’il ot veu li domage que Johannis i avoit fait à ses trencheors et à ses periéres às murs et às tors, qui mult avoit la ville empirié. Et lendemain si mût et chevaucha vers la terre Johannis, et chevaucha par quatres jorz. Et al cinquiesme jor, si vint al pié de la montagne de Blaquie, à une cité qui avoit nom Eului, que Johannis avoit novellement repoplée de gent. Et quant la gent de la terre virent l’ost venir, si guerpirent la cité, et fuirent és montagnes.
252. L’emperéres Henri se loja devant la ville ; et li courreor corrurent parmi la terre, et gaaingniérent bûes et vaches et bufles à grant plenté, et autres bestes. Et cil d’Andrenople qui avoient lor chars mené avec aus, et érent povres et diseteux de la viande, le cargiérent de forment et d’altre blé, et il trovèrent grant plenté de la viande. Et les autres chars qu’il avoient gaaingnié chargiérent à mult grant plenté.
