La Nouë avec quelque cavallerie et infanterie pour s’en saisir, comme il fit avant que nostre armée y arrivast, laquelle se campa à Sainct-Clair le premier jour d’octobre, près du lieu où, le jour auparavant, la rencontre de l’avant-garde des deux armées s’estoit faite si advantageusement pour les nostres, que, si la nuict n’eust arresté leur poursuite, et favorise la retraicte des huguenots, sans doute leur deroute eust esté plus grande et plus honteuse aux François qu’aux reistres et lanskenets, ausquels l’Admiral, qui estoit demeuré avec la bataille, donna l’honneur d’avoir bien combattu sous la conduite du comte de Mansfeld, qui seul fut cause de sauver l’avant-garde, et duquel le lieutenant, nommé le comte Charles, et quatre ou cinq autres capitaines avec luy demeurerent sur le champ, ausquels plus de cent cinquante de ceux de Mouy, et de la compagnie de Beauvais La Nocle, qui avoient soustenu la première charge que Martigues leur fit, y tinrent compagnie ; et entre autres, d’Audancour, lieutenant de Mouy, y fut tué.
