dessus la teste, & au tour du col, & dessus le dos : car les pennes de la queuë, & des aelles, sont brunes. Le bec est poinctu, noirastre, & foible, comme vivant de verms, ayant les bords, & le dedens de couleur jaulne : & les jambes, & pieds blanchastres. A peine que les habitants des villes puissent avoir ouï ce nom : car il est mesmement rare entre les villageois. Ainsi y ha plusieurs animaux ou choses produictes d’iceux, qui ont leurs appellations vulgaires entre gents d’un estat ou mestier, ignorees des autres. Monsieur Conradus Gesnerus Almant, medecin de Surie en Suisse, homme docte es trois langues, & de diligence extreme pour le profit de la posterité, & vigilant pour le bien public, & auquel les hommes doyvent autant de louange pour ses excellentes œuvres, qu’à nul autre qui ait mis la main à la plume lisant noz observations Françoyses, & trouvant que faisions mention des dents de Rohart, ha esté meu d’enquerir des hommes de nostre nation, qu’elle chose est dent de Rohart : mais à ce qu’il ha fait voir par escrit en son livre De quadrupedibus oviparis, onc n’en trouva un qui luy en dit nouvelles : toutesfois s’il eust envoyé enquerir en quelque grosse ville, comme Rouën, Paris, Orleans, Lion, Nantes, chez les tourneurs d’iviere, & faiseurs de pignes d’iviere, il n’y eust eu celuy qui ne luy en eust dit nouvelles : & mesmement luy en eust peu envoyer : Car c’est chez eux qu’on les trouve exposees en vente. Aussi qui vouldroit voir l’experiënce de l’appellation de cest oyseau, auroit à s’en enquerir aux oyseleurs, qui tendent par les forests : car ceux qui se tiennent es villes n’en sçavent nouvelles. Ceste Roussette rapporte grandement au Tariër, qu’avons d’escrit avec le Traquet : mais elle est de corpulence plus grandette, n’ayant aucunes taches blanches es aelles, ne les pieds & jambes noires, mais blanchastres.
