Comment cela ?
Depuis l’heure et le jour
Qu’une cité vous bastistes autour
De l’air liquide et la feistes si forte
Qu’on ne sçauroit la prendre en quelque sorte,
Tousjours les Dieux ont semblé decliner
Et leur grandeur en pauvreté tourner ;
Plus les mortelz ne leur font des offrandes
Et les verriez aller à longues bandes
Crians, bramans à leur Dieu souverain
Qu’ilz vont mourant de grand’rage de faim,
Que deffermer les passages il fasse
Et qu’un accord avecques vous il passe
A quelque prix que ce soit, moyennant
Que parmy l’air ilz s’aillent pourmenant,
Et qu’un chacun paisiblement joüisse
Des beaux presens qu’il eut en sacrifice.
Que dict Jupin ?
Il ne sçait bonnement
Comme il responde à leur contentement.
N’estant luy-mesme exempt de la famine
Qui ainsi qu’eux le consume et le mine.
Et ce qui faict qu’il est plus soucieux,
Il va craignant la revolte des Dieux,
Lesquelz faschez de vivre en leur mezaize
Et que leur mal Jupiter ne rappaize,
Le pourroient bien à la longue oublier
Et avec vous fugitifz s’allier.
