« Qu’il se destruit et plein d’audace glisse « Sans y penser dedans le precipice « Pour s’abysmer au gouffre de tout mal, « Allant d’un pas à sa force inesgal ; « Partant doib-t-il prendre de bon courage « La paix conclue à son desavantage « Ou à son bien et profit evident, « Et gaigne mieux quoyqu’il aille perdant, « Faisant la paix, qu’en sa fortune adverse « Osant tramer une guerre diverse. »
Sçavons que c’est, plus la paix n’attendrez Si ces deux pointz vous ne nous accordez : Que nous serons remis en nostre Empire Sans qu’il vous soit loisible de nous nuire A l’advenir d’effet ou autrement : Que Jupiter, pour plus asseurement Nous rendre unis, en mariage allie Le Dieu Coquard et la Zelotypie ; Ainsi seront les celestes et nous Ensemble estraintz d’indissolubles neudz.
Nous ne pouvons accorder voz demandes, Car elles sont inciviles et grandes.
Desirons-nous choses contre equité, Voulans rentrer en nostre dignité Par vous toluë et tousjours usurpée Par le seul droict de force et de l’espée, Et pensez-vous que nous vous faisons tort, Si pour vouloir asseurer nostre accord Nous demandons qu’un mesme lien presse Un Dieu puissant et une grand’Deesse ?
