Par l’eau du Styx dont le nom révéré
Jamais des Dieux ne se void parjuré,
Nous vous jurons en toutes asseurances
Que nous irons gardant nos convenances.
C’est assez dict, je vous croy fermement
Adjoustant foy à vostre jurement.
Aussi, Genin, que le Dieu de Lampsace
Soit vostre amy et rentre en vostre grace,
Estant compris souz l’accord de la paix.
C’est la raison, cela je vous prometz,
Combien qu’il soit motif de nostre guerre
Et que noz bois ayant voulu conquerre
Il nous ayt mis une nécessité
D’édifier en l’air nostre cité.
Il vous sera amy seur et fidelle
Uny à vous d’une paix eternelle,
Je vous l’asseure.
Luy promettons la paix pour nostre part :
Et maintenant pour la rendre accomplie,
Entrons dedans, venez, je vous convie,
Et vous emmeine affin de vous donner
Joyeusement à tous deux à disner.