Hastons nostre oeuvre et allons d’un plein saut
Battre le fer cependant qu’il est chault.
Mais je vous veux, ains que rien on advance,
Mener tous deux où est ma demeurance,
Qui est un nid sur un chesne entassé
D’herbe et de mousse à l’entour tapissé :
Entrons dedans et faittes que je sçache
Le nom de vous et qu’on ne me le cache.
J’ay nom Genin.
Et ce tien compaignon ?
Il est Cornard appelé en son nom.
Or soyez-vous trouvez à la bonne heure
Et avec moy montez où je demeure,
Je vous prendrai tous deux dessus mon dos,
Et de mon vol prompt, isnel et dispos
Tout aussitost allant le vuide fendre
Dedans mon nid je vous iray descendre.
Ton nid est-il assez ample pour nous ?
Il tiendroit bien dix hommes telz que vous.
Cela suffist, mais dis, je te supplie,
Pourrons-nous bien vivre en la compaignie
De vous Oyseaux, n’ayant de quoy voler
Quand nous voudrons, par la rondeur de l’air
