goules[1] Gastrolatres, comme tous estonnez, ouysmes ung son de
campane[2] notable, auquel tous se rangearent, comme en bataille, chascun par son office, degré et anticquité. Ainsi vindrent deuers messer Gaster, suyuans ung gras, ieune, puissant ventru, lequel, sus ung long baston bien doré, portoyt une statue de boys mal taillée et lourdement paincte, telle que la descripuent Plaute, Iuuenal et Pomp. Festus[3]. A Lyon, au carneual, on l’appelle Maschecroute : ilz la nommoyent Manduce. C’estoyt une effigie monstrueuse, ridicule, hideuse, et terrible aux petitz enfans, ayant les oeilz plus grandz que le ventre, et la teste plus grosse que tout le reste du corps ; auecques amples, larges et horrificques maschoueres bien endentelees, tant au dessus comme au dessoubz : lesquelles, auccques l’engin d’une petite chorde cachée dedans le baston doré, Ion faisoyt l’une contre l’aultre terrificquement clicqueter, comme a Metz Ion faict du dragon de sainct Clemens[4]. Approchans les Gastrolatres, ie veidz qu’ilz estoyent suyuiz d’ung grand nombre de gros varletz chargez de corbeilles, de paniers, de balles, de pots, poches et marmites. Adonques, soubz la conduicte de Manduce, chantans ne sçay quelz dithyrambes, crepalocomes[5], epaenons[6], offrirent a leur dieu, ouurans leurs corbeilles et marmites, hypocras blanc auecques la tendre roustie seiche.
| Pain blanc | Fressures. |
| Pain mollet. | Fricassees, neuf especes. |
| Choine[7]. | Pastez d’assiette. |
| Pain bourgeoys. | Grasses souppes de prime. |
| Carbonnades de six sortes. | Souppes Lionnoises. |
| Cabirotades[8] | Hoschepotz[9]. |
| Longes de veau rousty froides, sinapisees de pouldre zinziberine[10]. | Souppes de leurier. |
| Chous cahutz a la mouelle de boeuf. | |
| Coscotons[11]. | Salmiguondins[12]. |
Breuuaige éternel parmy, précèdent le bon et friant vin blanc, suyuant vin clairet et vermeil frays, ie vous diz froid comme la glace, seruy et offert en grandes tasses d’argent. Puys offroyent :
| Andouilles capparassonnees de moustarde fine. | Saumates[13]. |
| Hures de sangliers. | |
| Boudins. | Venaison sallee aux naueaulx[14]. |
| Saulcisses | Eschinees aux poys. |
| Ceruelatz. | Hastereaulx[15]. |
| Saulcissons. | Fricandeaulx. |
| Langues de beuf fumees. | Oliues colymbades[16]. |
| Iambons. |
- ↑ Grandes gueules.
- ↑ Cloche.
- ↑ Plaute, Rudens ; Juvénal, Sat. iii : et Pomp. Festus, I. XI.
- ↑ Le graouilli ou gargouille, qu’on portoit en procession pendant les Rogations.
- ↑ Chants d’ivrogne.
- ↑ Panégyriques.
- ↑ Pain de fleur de froment.
- ↑ Capilotates de volaille.
- ↑ Viandes cuites ensemble.
- ↑ De gingembre.
- ↑ Farine granulée cuite dans le bouillon.
- ↑ Salmis de viandes.
- ↑ Viandes salées.
- ↑ Navets.
- ↑ Rouelles de foie en brochette.
- ↑ Dans leur huile.
