nihil est ex omni parte beatum[1]. Mais il les fauldra brider à force de collations vespertines.
Italie, Romanie, Naples, Cecile, demourront où elles estoient l’an passé. Ilz longeront bien profondement vers la fin du Caresme, & resueront quelques fois vers le hault du iour.
Alemaigne, Souisses, Saxe, Strasbourg, Anuers &c. profiteront s’ilz ne faillent : les porteurs de rogatons les doibuent redoubter, & ceste année ne se y fonderont pas beaucoup de anniuersaires.
Hespaigne, Castille, Portugal, Arragon, seront bien subiectz à soubdaines alterations, & craindront de mourir bien fort autant les ieunes que les vieulx : & pourtant se tiendront chaudement, & souuent compteront leurs escutz, s’ilz en ont.
Angleterre, Escosse, les Estrilins, seront assez mauuais Pantagruelistes. Autant sain leurs seroit le vin que la biere, pourueu qu’il fust bon, & friant. A toutes tables leur espoir sera en l’arriere ieu. Sainct Treignant d’Escosse fera de miracles tant & plus. Mais des chandelles qu’on luy portera, il ne verra goutte plus clair si Aries[2] ascendant de sa busche ne trebusche, & n’est de sa corne escorné. Moscouites, Indiens, Perses, & Troglodytes, souuent auront la cacquesangue, par ce qu’ilz ne vouldront estre par les Romanistes belinez, attendu le bal de Sagittarius ascendant. Boesmes, Iuifz, Egiptiens, ne seront pas ceste année reduictz en plate forme de leur attente. Venus les menasse aigrement des escrouelles gorgerines, mais ilz condescendront au vueil du Roy des Parpaillons.
Escargotz, Sarabouytes, Cauquemarres, Canibales, seront fort molestez des mouches bouines, & peu ioueront des cymbales, & manequins, si le Guaiac
