& deſordre les procès, que la plume, le papier, &
l’ordre de iuſtice, n’auoyent iuſqu’a lors ſceu
vuider : De ſorte, que les chetifs, accuſez de conſpiration
& d’entrepriſe, tous nuds, mal-auiſez, demi
dormans, deſarmez, & entre les mains de leurs
ennemis, par ſimplicite, ſans loiſir de reſpirer, furent
tuez qui dans leurs licts, qui ſur les toicts des
maiſons, & qui en autres lieux, ſelon qu’ils ſe laiſſoyent trouuer.
Le comte de la Roche-foucaut, qui iuſques apres
onze heures de la nuict du ſamedi, auoit deuiſé,
ris, & plaiſanté auec le Roy, ayant à peine
cõmencé ſon premier ſomne, fut reſueillé par ſix
maſques, & armez, qui entrerent dans ſa chambre :
entre leſquels cuidant le Roy eſtre, qui vinſt
pour le fouëtter à ieu : il prioit qu’õ le traitaſt
doucement, quand apres luy auoir ouuert & ſaccagé
ſes coffres, vn de ces maſques (valet de chambre
du duc d’Aniou) le tua, par le commandement
de ſon maiſtre.
Bien eſt vray que le capitaine la Barge, qui
eſtoit l’vn des maſquez, auoit eu commandement
du Roy de l’aller tuer auec promeſſe d’auoir
la compagnie de gendarmes du comte de la
Roche-foucaut, ny eſtant autrement voulu aller
qu’à celle condition. Et quoy que le valet, comme
on m’a dit, l’ait anticipé à tuer, ſi n’a-il pas
pourtant moins eu la compagnie du comte meurtry.
Teligny fut veu de pluſieurs courtiſans, &
quoy qu’ils euſſent charge de le tuer, ils n’eurent
Page:Reveille-matin des François, 1574.djvu/105
Le texte de cette page a été corrigé et est conforme au fac-similé.
59
D I A L O G V EI.
