à ſcauoir qu’ils allaſſẽt à la meſſe, ſi leur vie & leurs
biens leur eſtoyent en quelque recommandation.
Le Roy de Nauarre (ſans toutefois condeſcẽdre
à la propoſition du Roy) luy reſpondit fort
humblement : & le prince de Condé, qui eſt
d’vne nature vn peu plus bruſque, ayant reſpondu
auſsi vn peu plus aſprement, ne fut menacé par le
Roy de moins, que de la perte de ſa teſte, s’il ne
ſe rauiſoit dans trois iours, que le Roy luy bailloit
pour tous delais, l’appellant opiniaſtre, obſtiné,
ſeditieux, & fils de ſeditieux.
Les autres Huguenots qui eſtoyent dedans le
Louure, auſquels à prix ou priere on auoit iuſqu’alors
ſauué la vie, promettoyent de faire tout ce
que le Roy commanderoit : Entre autres, Grammont,
Gamache, Duras, & certains autres, eurent
d’autant plus facilement leur pardon, que le Roy
ſcauoit fort bien, qu’ils n’auoyent iamais eu que
peu ou point de religion. A l’inſtant on ſonna le
toxin du Palais, afin qu’on ſe ruaſt ſur les autres
Huguenots (de toutes qualitez & ſexes) qui eſtoyent
dãs la ville : leur pretexte eſtoit, vn bruit qu’ils
firent courre, qu’on auoit deſcouuert vne conſpiration
faite contre le Roy, ſa mere, & ſes freres,
par les Huguenots : leſquels auoyẽt deſia tué plus
de quinze ſoldats de la garde (ce diſoyent ceux
qui eſtoyent morts) partant le Roy commandoit
qu’on ne pardonnaſt à pas vn Huguenot.
Les Courtiſans, & les ſoldats de la garde du
Roy, furent ceux qui firent l’execution ſur la Nobleſſe,
finiſſans auec eux (ce diſoyent-ils) par fer
