hommes qui n’ont pas flechi le genouil deuant
Baal. Fortifie-les, Seigneur, comme tu renforças
iadis par ton Eſprit ton ſeruiteur Daniel. Preſerue-les
comme les trois enfans en la fournaiſe,
afin qu’ils n’adorent l’image de ce grand Nabuchodonoſor.
Chaſſe-le pluſtoſt Seigneur, arriere
des hommes, ſon habitation ſoit auec les beſtes
des champs. Qu’on le paiſſe d’herbe comme
les bœufs, iuſqu’à ce qu’il te recognoiſſe pour
ſouuerain dominateur, Roy des Rois, & Seigneur
des Seigneurs, eſtabliſſant les dominations, & les
donnant & oſtant à qui & quand bon te ſemble.
Quant à ceux, Pere de miſericorde, qui comme
brebis ſans paſteur entre les loups affamez, pour
l’infirmité de la chair & foibleſſe de leur foy, font
de leur corps vn hommage contraint à ce morceau
de paſte tranſſubſtantié en chair, à ceſt accident
ſans ſuiet, forcez (par l’erreur commun qui
a obtenu lieu de loy) d’aller à la Meſſe, pour ſauuer
leur vie & leurs biens : Monſtre-leur, Seigneur,
& leur fay ſentir viuement & à bon eſcient
en leur cœur, combien ta gloire & ton honneur
nous doyuent eſtre plus recommandez que noſtre
propre vie. Fay leur cognoiſtre l’outrage
qu’ils font à ta maieſté, adherant tant ſoit peu au
ſeruice des faux dieux, que Dauid ne vouloit pas
ſeulement nommer par ſa bouche.
Que l’impudicité eſt trop grande de la femme,
qui apres s’eſtre oubliee, lors que ſon mari la
chaſtie, recourt ſoudain à ſon paillard.
Que tu vomis les tiedes, & ne prens point
plaiſir à ceux qui clochent des deux coſtez.
