moin à ta verité eternelle : afin qu’apres l’eſtonnement,
eſtans par toy releuez & ſouſtenus, ils ſeruent
plus ardemment à ta gloire, qu’ils n’ont fait
par cy deuant. Que ſi c’eſt malicieuſement contre
ta vérité cognue qu’ils ſe bandent, s’obſtinans
à leur eſcient à te faire outrage, mon Dieu, fay les
ſemblables à la rouë, & au tourbillon : pourſuy-les
par terreur & eſpouuantement : rempli leurs
faces de meſpris, & darde ſur eux ta cholere : fay
pleuuoir charbons ſur leur teſte, feu, ſoulphre &
vent de tempeſte ſoit la portion de leur hanap, afin
que toute la terre cognoiſſe, que tu es noſtre
Dieu & Sauueur.
Et nous alors ton vray peuple & tes hommes,
Et qui troupeau de ta paſture ſommes,
Te chanterons par ſiecles innombrables,
De fils en fils preſchans tes faits louables.
Ali. Ie m’eſmerueille grandement, ſeigneur politic
François, conſiderant le piteux eſtat de la Frãce
(ſi tu as ta patrie en quelque recommandatiõ)
maintenant qu’elle a plus de beſoin de ſes vrais
amis & bons conſeillers quelle n’eut oncques,
comme c’eſt que tu as eu le courage de l’abandõner :
au lieu de t’employer à guairir ſa playe, à la
penſer, de la freneſie & de la rage qui la mene.
Le pol. Ie n’en ſuis parti qu’en pleurant, auec vn
regret incredible, preuoyant la prochaine & ineuitable
ruine, où va tomber ce poure Royaume,
pour l’extreme confuſion où il eſt : laquelle i’oſe
aſſeurer eſtre irremediable, au jugement de tous
bons eſprits : car (ie me tay de la religion des Huguenots
en laquelle ie n’ay iamais peu mordre,
