Par vne vengeance diuine :
La charongne de Catherine,
Sera differente en ce poinct :
Les chiens meſmes n’en voudront point.
Voila à mon aduis les choſes qui ont ainſi fait
enrager ceſte bonne dame. Et penſes tu ſi elle ne
ſcauoit au vray que Ronſard a faict les autres vers
qu’Alithie recitoit tantoſt d’elle & de ſes enfans,
qu’elle ne creuſt : que c’eſt quelque Huguenot qui
la gallope de la ſorte, quoy qu’elle donne auec les
ſiens par trop d’argumẽt aux Papiſtes de crier aux
armes contre eux.
Ali. Ie le croy biẽ : Mais encore ne touchez-vous
point à la vraye matiere qui l’a reduite à ces furieuſes
idées. Tenez pour certain, que ceux qui
vomiſſent comme elle, le don celeſte (à ſcauoir
la cognoiſſance de Dieu en ſon Fils Ieſus Chriſt
qui eſt ſa parole) & malicieuſement ſe bandent
contre la verité qu’ils cognoiſſent, ne trouuans aucun
lieu de repentance, ſont tellement abandonnez
de Dieu, qu’ils entrent aiſement en ceſte rage
canine, qui les fait mordre & deuorer tout ce
qu’ils rencontrent.
Phil. Vous m’auez fait ſouuenir d’vn ſonnet qui
fut fait pour elle y a enuiron cinq ans, ſur ce ſubiect,
lequel i’ay retenu par cœur, & ie le vous reciteray
preſentement.
Lors qu’vn zele baſtard, enfant de l’ignorance
Ton Henry furieux incitoit à pourſuyure
Par feu, ſang & tourmens, ceux qui deſiroyent viure
En la crainte de Dieu ſous ſon obeiflance,
