ne laiſſent pas d’eſtre inuiolables : Et toutefois ſi
on tenoit leurs maiſtres, on les traiteroit hoſtilement :
Mais le priuilege des ambaſſadeurs eſt
fondé ſur vn droict de gens, par ce que s’il n’y auoit
franchiſe & immunité pour telles perſõnes,
toute ſeureté humaine ſeroit perdue, & ceux meſmes
qui les offenſeroyent ſont intereſſez à les cõſeruer,
autrement on en feroit autant des leurs.
Les Conſuls Romains reſpondirẽt à Hanno ambaſſadeur
des Carthaginiens, que leurs maiſtres
meritoyent qu’on ne leur tint point la foy nõ plus
qu’ils l’auoyent tenue à leurs ambaſſadeurs : mais
ils ne vouloyent pas punir au ſeruiteur ce que le
maiſtre meritoit, non pour autre choſe que pour
la foy publique. D’ailleurs il y a des faicts, qui
ſont excuſables voire louables aux ſeruiteurs, freres,
enfans & femmes pour vne fidelité & affectiõ
ſeruiable & offcieuſe, qui toutefois ſeroyent bien
punis aux maiſtres, peres & meres. Les hiſtoires
des ſeruiteurs qui ont hazardé leur vie pour ſauuer
la vie de leurs maiſtres iuſtemẽt condamnez,
ſont vulgaires & en louange à chacun. Mais ſi les
condamnez euſſent fait de meſme, ils euſſent eſté
doublement punis.
La ſeconde qualité & circonſtance de ce que la
royne d’Eſcoſſe eſt refugiee en Angleterre, & par
ainſi ne peut eſtre offenſee ſans reproche & note
de perfidie, fait pareillemẽt contre elle. Car d’autãt
sõ ingratitude eſt plus puniſſable, d’auoir voulu
oſter la vie à celle qui luy conſeruoit la ſiene.
Si celuy qui n’a rien merité enuers le Prince qui
le reçoit à refuge, veut que pour le ſeul reſpect
