le ſien aux pieds : ie les ay laiſſez la : & ay paſſé de
Emden en Angleterre, où i’ay trouué, les nouuelles
que i’allois annoncer de la verité des Maſſacres,
eſpãdues au long, & au large par toute l’iſle :
les Eccleſiaſtiques, les Nobles , & le peuple,
tous eſchauffez à les vouloir venger, ne demandans,
que congé de la Royne, pour pouuoir gueer
leurs foſſez. I’ay trouué, en ſomme, les choſes ſi
bien diſpoſees, qu’il m’a ſemblé, de prime face,
qu’il ne ſeroit ia beſoin de leur faire plus grande
inſtance, ny pourſuite de ſecours, que d’eux-meſmes
ſans eſtre preſſez d’auantage, ils s’y achemineroyent
aſſez.
Ce neantmoins i’ay fait la reuerence à la Royne,
& aux ſeigneurs de ſon Conſeil, ie leur ay fait
entendre l’occaſiõ de ma venue : & la charge que
l’Egliſe m’auoit donné : ie leur ay dit là deſſus que
qui voit bruſler la maiſon de ſon voiſin, doit auoir
peur de la ſiene : que ces foſſez qui ſeparẽt la grãd
Bretagne du reſte du mõde, ne ſont pas ſuffiſans
à empeſcher la flamme de la cruauté de la maiſon
de Valois, de voler ſur les Anglois. Qu’on a accouſtumé
de porter de l’eau, à la maiſon du voiſin
qui bruſle, encore que ce fut la maiſon de ſon
ennemy. Ie leur ay auſsi auãcé les meſmes authoritez
de l’Eſcriture, les exemples & raiſons, alleguees
aux princes Proteſtans, ie leur ay remõſtré
qu’il ny eſcheoit qu’à bailler congé à quelques
Myllords, qui s’offroyent d’aller à leurs deſpens,
à vn nombre de nobleſſe, & de peuple volontaire,
pour voir bien toſt vengé, l’outrage fait à Dieu, &
à ſon Egliſe Françoiſe.
