mené en Angleterre, où ie le vy chez le Seigneur
de la Motte Fenelon, ambaſſadeur du Tyran.
Le pol. Puisque ce Capitaine eſtoit parent d’vn ſi
honeſte homme, il ne pouuoit eſtre que braue, &
bien excellent guerrier, on ne prent pas tels chats
ſans mouffles.
L’hi. Tu ſerois bien marry, ſi tu ne diſois le mot
en paſſant à ton accouſtumee, he dea ! ceſtuy-là
n’eſtoit pas de ſes parens de maintenant, qu’il eſt
comte de Rets, encore moins des parens de Mõſieur
le mareſchal de Rets, il luy appartenoit ſeulemẽt,
du temps que le pere d’Albert Gondy, Florentin,
marchand en ſon viuant à Lyon, venoit de
faire freſchement Banque route, du temps auſsi
que le Peron, eſtoit vn commiſſaire des viures,
aux guerres de Mets : ou du temps qu’il eſtoit garſon
de coutouër chez Bonuiſi à Lyon, & que ſa
mere, fille de Pierre Viue, marchand de Lyon,
couroit l’eſguillette par tout.
Le pol. Il ne paya donc gueres de rançon, le vilain,
à celuy qui le fit priſonnier.
L’hi. Ie te le laiſſe à penſer, chacun ſcait biẽ qu’il
n’auoit lors vn ſeul double qui fuſt à luy, & auiourd’huy,
chacun ſcait bien que pour auoir monté
la Mere, ce Landry à tout ce qu’il veut, commãde
par tout à baguette, fait changer le quarré, en
rond, & a luy ſeul, plus de finances, qu’vne douzaine
des plus grands : Mais, pour reuenir à nos
moutons, d’où ce bouc m’auoit deſtourné, le cõte
de Montgomery eſtant à Belle-iſle, les poures
gens de la Rochelle, ayans veu que le ſecours auquel
ils eſperoyent le plus, apres Dieu, ne les pou-
