ſiours nourris en ſeruage, & commandez à baguette
comme l’on dict, au plaiſir de ceux que les
Rois leur eſleuoyent deſſus la teſte : Car tel eſtoit
leur plaiſir : Ils prioyent que ie ne trouuaſſe
pas eſtrange ſi eux, (qui auoyent eſtroicte confederation,
& intelligence auec nos freres de
Languedoc, Viuarez, & autres) me renuoyoient
auec quelqu’vn d’entre eux au Conſeil qu’on
tiendra à Niſmes, pour ordonner de leur eſtat &
police.
Quant à eux, ils cognoiſſoyent facilement
qu’ils auoyent beſoin parmi eux de ces deux nerfs
tant excellens pour tenir les vices en bride, & les
ſoldats en leur deuoir : à ſcauoir de la diſcipline
Eccleſiaſtique, & de la diſcipline militaire : ayans
au reſte tout ce qui rendoit les hommes hardis,
& vaillans : A ſcauoir eſt, la bonne cauſe,
qui rend la conſcience toute aſſeuree, d’où le bon
cœur a accouſtumé de ſortir, & la neceſsité de ſe
deffendre, qui rend les couards, courageux pour
conſeruer leurs biens, leurs vies, leur honneur,
leur ſalut, & celuy de leurs familles, contre la rage
de ces traiſtres, qui les aſſaillent à credit, d’vn
cœur animé à mal faire, alteré du ſang innocent,
qu’ils eſtoyent tous bien reſolus de iamais plus
ne s’y fier : & de ne plus poſer les armes, quelque
paix qu’on leur ſceuſt offrir, s’on ne leur bailloit
de bons gages, bons oſtages, & reſpondans.
Sur ces mots, de ne poſer les armes, pource
que le ſeigneur de Gordes, qui cõmande pour le
tyran en Dauphiné, auoit reſcrit à quelqu’vn des
chefs de nos freres, des letres fort douces, luy
