L’hi. Cela va bien. Car autrement il pourroit auenir
tout plein d’inconueniens, s’il n’eſtoit loiſible
d’accuſer les plus grands. Et s’il n’y auoit ordre
ſuffiſant eſtably pour les chaſtier, Quelqu’vn
pourroit comploter auec l’ennemy : le peuple ialoux
de ſa liberté ne pourroit que mal volontiers
ſouffrir ſes deſportemens, on luy dreſſeroit des
parties. Celuy là ſe voudroit preualoir de ſes amis,
on viendroit de la aux factions & partialitez
& moyens extraordinaires, qui ſont la ruine des
eſtats libres. Ou s’il eſtoit loiſible de calomnier
& faire courre de faux bruits par cy par là contre
vn chacun : comme il eſt auenu maintesfois qu’õ
a mis à ſus aux plus gens de bien qu’ils auoyent
deſrobé le threſor publique, à d’autres qu’ils pouuoyent
bien prendre vne telle ville s’ils euſſent
voulu, & à d’autres qu’ils ont vendu pluſtoſt que
rendu par force vn tel chaſteau, & pluſieurs autres
telles calomnies.
Si, dis ie, il eſtoit impunément permis de calomnier,
il n’y auroit homme de bien, qui ne fuſt
deſgouté de ſa charge, l’ennemy ſe pourroit preualoir
de telles fautes, & en ſomme tout iroit en
cõfuſion. Comme il cuyda auenir à Rome, apres
que Furius Camillus l’eut deliuree des mains des
François.
Il ſembloit bien que tous les citoyẽs Romains
ſans faire tort à leur reputation deuoyent ceder
à la vertu de ce grand Camillus, comme de leur
liberateur, & à la verité auſsi chacun luy defferoit
volontiers le premier reng. Le ſeul Manlius Capitolinus
ne pouuoit ſupporter de le voir en tel-
