I’obmets, que parmy pluſieurs Medailles de la Liberté, il s’en trouue quelques-vnes où elle ſe void tenant d’vne main vne maſſuë comme celle d’Hercule, & de l’autre vn Bonnet, auecque ces mots, Libertas Avgvsti ex SC. Ce qui ſignifie vne Liberté acquiſe par la valeur, comme il ſe remarque dans la Medaille d’Antonin Heliogabale, où eſt adjouſté vn joug rompu.
Liberalité. LXXXVII.
Ette Femme qui la repreſente a les yeux vn
peu enfoncez, le nez aquilin, & le front carré.
Elle a de plus vne robe blanche, vne Aigle ſur
la teſte, vn Compas en vne main, auec vne Corne
d’aondance renuerſée, d’où s’eſpandent
diuers joyaux, & autres choſes de prix, outre qu’elle en tient
vne autre pleine de fruicts & de fleurs.
La Liberalité, qui conſiſte en vne deſpenſe honneſte & moderée, eſt peinte auec des yeux enfoncez, & vn front carré, par vne maniere de reſſemblance auec le Lyon, le plus liberal de tous les animaux irraiſonnables.
Vne Aigle eſt perchée ſur ſa teſte, pour nous apprendre, Que le plus haut point de cette vertu ne giſt pas en l’action de donner caſuellement aux autres ce qui eſt à nous ; Mais en l’habitude & en l’intention : ce qui eſt encore le propre des autres vertus. C’eſt ainſi que l’Aigle, au rapport de Pline, ayant pris quelque gibier, n’en mange pas tant, qu’elle n’en laiſſe toûjours vne partie pour les autres oyſeaux, comme glorieuſe qu’elle eſt, de voir pluſieurs animaux viure de la chaſſe qu’elle a faite.
Les deux Cornes d’abondance qu’elle tient de la façon que nous auons dite, monſtrent, Que les grandes richeſſes portent vn eſprit genereux à faire du bien, non pas tant pour en tirer vanité, que pour en aſſiſter vertueuſement ceux qui en manquent.
Elle eſt veſtuë de blanc, à cauſe qu’elle eſt ſans eſperance d’aucuns intereſts, comme cette couleur eſt ſimple, & ſans artifice.
C’eſt pour cela meſme, qu’on luy met vn Compas à la main,
