L’Arioſte l’appelle à ce propos, vn ſanglant Boute-feu, & luy fait tenir vn Fuſil en main, pour monſtrer, Que la Colere s’enflamme par le contraſte de deux perſonnes obſtinées, comme nous voyons que le feu s’allume à force de battre le Fuſil.
Santé. CXLVII.
Lle eſt repreſentée par vne Femme qui eſt en la
fleur de ſon aage, ayant vn Coq en la main droite,
& en la gauche vn Baſton noüeux, où s’entortille
vn Serpent.
Le Coq eſt conſacré à Eſculape, inenteur de la Medecine, pour monſtrer qu’il faut de neceſſité qu’vn bon Medecin ſoit vigilant, & touſiours ſoigneux de viſiter ſes malades. Auſſi eſt-il vray que cét Oiſeau ſolaire, à qui les Anciens ſacrifoient comme à quelque Dieu, ſi fort ils le reueroient, eſt le vray ſymbole de la Vigilance. Ce fut pour cela que Socrate vn peu auant que mourir, legua par ſon teſtament ſon Coq à Eſculape, pour apprendre aux Philoſophes de ſon temps, dont il eſtoit le plus ſage, Qu’il n’y auoit que les Dieux, deſquels ils tenoient l’eſtre, qui peuſſent guerir les inquietudes & les langueurs de la vie.
Sapience. CXLVIII.
A figure eſt celle d’vne ieune fille, qui dans l’obſcurité
de la nuict tient de la main droite vne Lampe
allumée, & de la gauche vn grand Liure.
On la peint ieune, pource qu’elle commande aux Aſtres, qui ne la peuuent faire vieillir, ny luy oſter l’intelligence qu’elle a des ſecrets de Dieu, qui ſont eternels.
La Lampe allumée ſignifie la lumiere de l’entendement, qui par vne particuliere grace de Dieu s’allume & s’entretient dans noſtre ame, ſans iamais diminuer : Car c’eſt par noſtre ſeule faute que l’entendement perd ſa propre clarté, en ſe laiſſant offuſquer par les tenebres du vice, qui ne peuuent donner lieu à la Sapience, mais enueloppent l’eſprit d’erreurs & de mauuaiſes penſées.
