Mais te l’ay rendu. Cecy est conforme à la sentence de ce grand amy de Dieu Job, comme il est escript au i. ch. de son livre. Dieu me l’a donné, Dieu me l’a osté. Il s’est fait comme il a pleu au Seigneur, le nom de Dieu soit béni. Et ne faut douter que cecy ne se raporte à la volonté de Dieu par l’opinion du philosophe. Car il dit apres mais celuy qui me ravist le mien est meschant. Que te chaut-il par qui celuy qui te l’a donné le te redemande ? Ces ravisseurs et persecuteurs des justes sont bourreaus et comme fleaus et verges de Dieu, qui sont apres jettées au feu. Ce qui est gentilement discouru par Synese evesque de Ptolemaïde en ses Épistres que Suyde appelle merveilleuses. Là il nomme ces tyrans ϰαϰοποιοὺς δυνάμεις, c’est à dire puissances mauvaises et meffaisantes, dont j’ay parlé en ma Tragœdie Aman qui est au jour.
Les Roys sont verges de Dieu
Et fleaus du peuple Hebrieu
Qui n’excedent une onglée
De leur puissance réglée.
Et bien que mis en besoigne
Par le vouloir du Seigneur,
Leur cruauté les éloigne
Et prive de sa faveur.
Car Dieu se sert des meschans
Au salut de ses enfants,
Et souvent les plus coupables
Sont tyrans des miserables.
Je n’aurai pas dequoy. Cecy est conforme à la parolle
