un nombre infini de singulieres beautés, desquelles apres tout a un coup elle l’orna. Dit d’auantage, qu’Amour lui mist dans l’oeil, tout ce qu'il avoit de beau, de chaste, d’honeste: tellement qu’elle estant encores au ciel émouvoit a son amour les dieus. Apres descendue du ciel en terre, rauist tellement l’esprit du Poëte, qu’il est impossible, que jamais il mette sa pensée en un autre. Quand je la vi) C’est une allusion a la devise du Poëte prinse de Theocrite, qui est, ὧς ἲδον, ὧς ἐμάνην: C’est a dire, que des la première fois, qu’il vit Cassandre, il devint insensé de son amour.
Dans le serain de sa jumelle flame
Je vis Amour, qui son arc débandoit,
Et sus mon coeur le brandon épandoit,
Qui des plus frois les moüelles enflame.
Puis ça puis la pres les yeus de ma dame
Entre cent fleurs un ret d’or me tendoit,
Qui tout crespu blondement descendoit
A flos ondés pour enlasser mon ame.
Qu’eussaï-je, fait? l’Archer étoit si dous,
Si dous son feu, si dous l’or de ses nous,
Qu’en leurs filés, encore je m’oublie:
Mais cet oubli ne me tourmente point,
Tant doucement le dous Archer me point,
Le feu me brûle, & l’or crespe me lie.
MVRET.
Dans le serain) Il poursuit a raconter comment il fut surpris: disant qu’il vit Amour dans les yeus de Cassandre, desbendant son arc contre luy, epandant cet
