Mais il ne m’ert ja reprochié
Que tel chetif fière ne bate :
Quar trop petit d’ennor achate
Qui sur tel chetif met sa main ;
Mais se tu ne voies demain
Entre nos qui somes de feste[1]
Tu te plaindroies de la geste.
Or t’en va, beax amis, va-t’en,
Esté avons en autre anten.
Fui de ci, si feras que saiges,
Ou tu auras parmi les naiges[2]
D’une grosse aguille d’acier.
Nos ne t’en volons pas chacier
Vilenement ; par nostre honte,
Nos savons bien que henor monte.
LA RESPONSE DE L’UN DES DEUX RIBAUZ.
Tu m’as bien dit tot ton voloir :
Or te ferai apercevoir
Que ge sai plus de toi assez
Et si fu mieldres menestrez.
De toi moult me vois merveillant,
Ne l’ dirai pas en conseillant ;
Ainz veuil moult bien que chacun l’oie :
Se Diex me doing henor et joie,
De tex menesterex bordons
A qui en done moult beax dons
A hautes cort menuement
Qui bien sordit et qui bien ment,
Cil est cires des chevaliers,
As cointereax, as mal parliers :
Plus donnent-ils as menteors
Qu’ils ne font as bons troveors,
Qui contruevent ce que il dient,
Et qui de nului ne mesdient;
