Page:Rutebeuf - Oeuvres complètes, recueillies par Jubinal, tome I, 1839.djvu/374

342

NOTES

Se je ne devoie mangier
En .ij. jours de pain que déemie,
Ne m’i embateroie mie ;
Mais s’il i a aucun preudomme
Ki d’onneur faire se renomme,
Se il perçoit de mon afaire
Que je li sace dire et faire
Cose ki face à congoïr,
Se li preudom le veut oïr
Je ne m’en doi trop présenter
Ne il aussi trop démenter
De me cose oïr volentiers ;
Ains doit comme vaillans rentiers
Par cortoisie sans haussage
Moi proier et par son message
D’o lui mengier, et je doi estre
De tele contenance en l’estre
Ke g’i soie amés et oïs.
Si fais mengiers est congoïs :
Nul autre mengier je ne quer
Dont se cascuns s’avoit men cuer
Li siècles trop miex en vauroit,
Car tès .ij. ménestrel vauroit
Ki n’en vauroit pas .iij. ne quatre,
Car il sont si hardi d’embatre
C’on n’ose le honteus prier,
Por ce k’il vienent sans prier.
Si s’en va li honteus mucier
Et li faus s’embat sans hucier,
K’il ne li caut que on li die,
Et li honteus pert et mendie
Ki de honte ne s’ose offrir.
Trop a li honteus à souffrir,
Car li siècles est tés menés
C’ançois que li dons soit donnés
S’en fera-on proier .c. fois.
Il n’est mais carités ne fois ;
Et tés promet qui riens ne donne :
Mal ait langue ki s’abandonne
A trop hardiement prometre
Et si ne veut riens du sien metre !
S’est li faus prometères teus,
Que s’il a proumis le honteus
Ki nient ne li ara requis