Page:Rutebeuf - Oeuvres complètes, recueillies par Jubinal, tome I, 1839.djvu/375

343

ET ÉCLAIRCISSEMENTS.

S’iert ciex si de tous biens estruis
Que u le don ara proumis
Ert li voloirs en lui remis,
Et à .i. autre le donra,
Por ce ke on l’empriera :
Ensi ment et li honteux pert,
Por ce c’on voit tout en apert
K’il ne s’ose ramentevoir.
Pluiseur voelent les dons avoir
Por prières sans desservir :
Ce fait le donneur asservir.
Tés ne set riens ki le don prent,
Et ce don prendre li aprent
Ciex ki li rueve u li porcace ;
Et li honteus, ki riens ne cace
A prier n’a faire rouver,
Ne voit à nului si bien prouver
Ki riens li doinst : c’est grans mesciés
Quant caitis prent, si faut li ciés.
Je le tieng à trop grant desroi,
Quant li honteus le don d’un roi
Par raison desservir saroit
U ciex pour les iex n’oseroit
Por mestier faire passer porte.
Ki le don au haut homme enporte,
On doit bien si fait don haïr.
Et plus je ne m’os envaïr
A rouver, pas ne l’ai apris :
S’on m’a donné, et je l’ai pris,
Rouvers fait trop l’omme abaissier :
Tel mestier me convient laissier
Se je ne me trai ens u règne
U courtoisie maint et règne
Et k’amés i soit li honteus,
Car tenus me sui avoec teus
Dont peu de pourfis m’est venus ;
Trop longuement m’i sui tenus.
De ramposnes me sevent moistre :
Les gentix hommes voel connoistre
Ki au bien se sèvent entendre ;
Miex ameroie avoec aus tendre
Et rompre où jou ai tant tendu ;
Car s’il avoient entendu
Se je sai du mestier ouvrer,