Se je sanz deservir cuidoie avoir mérite
Que je por repentir en la fin fusse quite,
Jamès ne querroie estre ne moine ne hermite,
Mès nous ne trovons pas ceste matère escrite.
Trop auroient dont fet li Cordelier fol change
Qui toz jors vont deschaus et se frotent au lange,
S’il cuidoient avoir paradis sans eschange :
Jamès la bone vie ne lor seroit estrange.
Por c’est fols cil qui pèche en itel espérance,
Quar nos n’avons de vivre ne plège ne fiance.
S’il est saus en la fin par bone repentance,
Por ce n’est-il pas quites de fère penitance.
E, Diex ! la penitance seroit bone en la vie,
Quar qui sauroit l’angoisse, la dolor, la haschie
Qu’il covient sofrir l’âme ainz que soit espenie,
Jamès de pechié fère ne li penroit envie.
Il i a tel des âmes qui .c. anz art et frit
El feu de purgatoire, dont l’Escripture dist
Que d’un pechié mortel c’on fet en faus délit
Li covient .vij. anz estre ainz qu’ele s’en aquit.
Qui .vij. anz seroit nus par la plus grant froidor
C’onques fust en yver par la froidor greignor,
N’auroit-il en .vij. anz la moitié de dolor
Com d’estre el purgatoire la quarte part d’un jor.
Vous, gens qui ne finez d’emprunter et d’acroire,
Vous vous aquiterez se vous m’en volez croire,
Quar celui paiement dont cis siècles est foire
Il n’i a que .ij. tables, une blanche, l’autre noire.
Cil tient la noire table qui les orguillex donte,
Qui tost ne vient finer ne puet venir à conte ;
S’il atent paiement il aura tant de honte :
Jamès n’aura paié le chatel ne la monte.
Hé, las ! li endeté seront si mal venu
Toute jor seront ars traîné et batu ;
S’il péussent morir bien lor fust avenu,
Mès jamès ne morront ne jà n’auront rendu.
Page:Rutebeuf - Oeuvres complètes, recueillies par Jubinal, tome I, 1839.djvu/433
Le texte de cette page a été corrigé et est conforme au fac-similé.
401
ET ÉCLAIRCISSEMENTS.
