Qui lors avoir ne le péust
A transcrire, s’il li pléust :
La trovast par grant mesprison
Mainte tele comparaison.
Autant cum par sa grant valor
Soit de clarté, soit de chalor,
Surmonte li solaus la lune
Qui trop est plus troble et plus brune,
Et li noiaus des nois la coque
(Ne cuidiés pas que ge vous moque,
Sor m’âme, le vous di sans guile),
Tant sormonte cest évangile
Ceus que li quatre evangelistres
Jhesu-Crist firent à lor tistres.
De tex comparaisons grant masse
I trovast l’en que ge trespasse.
L’Université, qui lors ière
Endormie, leva la chière,
Du bruit du livre s’esveilla,
N’onc puis gaires ne someilla ;
Ains s’arma por aler encontre,
Quant el vit cel horrible monstre
Toute preste de bataillier,
Et du livre as juges baillier ;
Mès cil qui là le livre mistrent
Saillirent sus et le repristrent,
Et se hastèrent de l’ respondre,
Car il ne savoient respondre
Par espondre, ne par gloser
A ce qu’en voloit oposer
Contre les paroles maldites
Qui en ce livre sunt escriptes.
Or ne sai qu’il en avendra,
Ne quel chief cis livres tendra ;
Mès encor lor convient atendre
Tant qu’il le puissent miex défendre.
Ainsinc Ante-Christ atendrons,
Tuit ensemble à li nous rendrons :
de Notre-Dame s’en trouvèrent incommodés. Les écoles, qui étaient au septentrion, furent donc, en 1257, transférées au midi, entre le palais épiscopal et l’Hôtel-Dieu.
