Page:Rutebeuf - Oeuvres complètes, recueillies par Jubinal, tome I, 1839.djvu/468

436

NOTES

Che sont li visce ou mont, che tesmoingne Escriture,
Par coi toutes vertus devient anchois oscure.
Ensi va maintenant li siècles male alure,
Car puis que li chiés faut, il convient par droiture
Les membres par desous traire à desconfiture.
Li prinche en leur sougis ne resgardent mesure,
Ne prélas en le foy, dont or fust mal séure
Toutes crestientés, et souffrist grant laidure,
Se Charles n’i éust mis piechà si grant cure ;
Par devers mescréans garda bien le pasture :
Il tous seus nous tu clés et deffense et closure.
Or vaurrai revenir à me première ourture
Des messages au pape et de leur aventure.

Quant orent besoingnié et pris congiet à droit,
Retourné sont à Rome, où on les atendoit,
Et revenu anchois c’on ne les espéroit.
Sans arester venu sont au pape tout droit ;
Le pié li ont baisié, si com il afferoit,
Et puis li ont conté comment le cose aloit,
Et en contant, chascuns de Charlon se looit
Selonc che qu’en sen lieu retenus les avoit.
Après li ont baillié l’escrit qui contenoit
Le besoingne plus clère, et plus grant foi portoit,
Car li propres séaus du bon conte i estoit.
Devant les cardonnaus li papes les rechoit,
Et lut, et en lisant de joie larmoioit
Et Dieu de l’aventure humlement grascioit,
Et chascuns cardonnaus qui lire li ooit ;
Et pour chou que le pule esvertuer voloit
Pour si noble secours que venir li devoit,
Le fist savoir à tous, et si leur preéchoit
Pour miex persévérer en chou qu’il emprendroit ;
Et li queins d’autre part entr’oeus s’apareilloit.

Et prist gent de s’amour et de se connissanche,
Monseigneur Jaque Antiaume où il avoit fianche,
Et autre bonne gent sage et de grant vaillanche.
Si les envoie à Rome en plus grant espéranche
De se venue avoir, et pour metre ordenanche
Ou païs tant qu’il ait toute se pourvéanche,
Et si leur a mandé, non pas par esmaianche,
Jour quant il seroit là sans nesune escusanche.
Pour chiaus asséurer de toute dechevanche,