NOTE A bis.
Audafrida fabuli fabula, quant il l’a barula sua sor le fossé
entre .ij. vers. La tierce meure. — Dist li vilains qui ne
savoit deviner .xiiii. et .xiiii. ce sont .xvii. et puis .iii. .xxx. .i. Qui ne set conter si perde. — Ge vos di, beau
seignor, qu’il sont en cest siècle terrien .v. manières
de choses, dont li preudom doit bien croire sa preude
feme, s’ele li dit : la première chose si est tele que si la
met en .i. for tot chaut comme por pain cuire, et il li
viègne au-devant et li demant : « Bele suer, coment vos
est-il ? » S’ele dit : « Sire, ge n’ai pas froit ; » certes, il
l’en doit bien croire. L’autre enprès si est tele que s’il la
met en .i. sac et il loie bien la bouche, et il la gite desor
le pont en l’aive, et il li viegne au-devant et il li
demande : « Bele suer, coment vos est-il ? » S’ele li dit :
« Certes, sire, ge n’ai pas soif ; » il l’en bien doit croire.
La tierce après si est tele que se ele travaille d’enfant,
et il li vîegne au-devant, et il li demant : « Bele suer,
coment vos est-il ? » Se ele li dit : « Certes, sire, ge sui malades ;
» il l’en doit bien croire, que si est-ele. — La quarte
après si est tele que se li preudons vient devant sa
preude feme, et il li demande : « Dame, que feroiz-vos ? »
Et se ele li respont : « Sire, je vos corrocerai. » Il l’en
doit bien croire, que si fera-ele, se ele puet. — La quinte
après si est tele que se la preude fame se gist delez son
seignor, et ele s’est endormie, et ele lait aler ou pet ou
vesse, et li preudons la sente, et il li dit : « Bele suer,
vos vos conchiez toute. — Par mon chief, sire, fait-ele,
mais vos ; » il l’en doit bien croire, quar si fait-ele. Ele
ne se conchie pas, ainz conchie son vilain ; si se nestoie,
quar ele le délivre de la merde, si l’en aboivre.