moi. Par aventure il i a ci de tex qui me croient et de tex qui ne me croient mie ; mais ne por quant, tel s’en porroit chifler et gaber, et rire et joer, et rechignier des denz, et bouter de l’ coute, et marchier du pié, et clignier des elz, qui mult grant mestier auroit de m’aide, s’il se voloit bien conseiller. Ge di se vos ne me créez, que vos soiez ci venuz por moi chifler[1], ge pri à la vraie piteuse, ge di à celi noméement qui pita as piez de Pitoribus quant il nasqui de la vraie piteuse, que de celui maléiçon don Corbidas le ju, je fu maudiz. Ge di celui noméement qui forja les .xxxv. pièces d’argent en la tor de Cayfas à .iii. liues petites d’Acre, dont li cors Dieu lu venduz et travilliez, soit li cors maudiz et confonduz de la grieve du chief de ci qu’à l’ongle du pié, de si que à l’eure et el termine que il seront venuz à moi, et ge les assoudrai de cele absolucion dont Diex assolt ses apostres, et que ge lor monsterrai la dame des herbes. Vos ne savez pas, mais je le vo dirai.
Ge di cele noméement qui brait et crie .iii. foiz en l’eure, et el termine que Diex fu mis en croiz. Vez-là ci dedenz, se vos ne m’en créez. Ge di s’il i a ci nul de vos ne nule qui ne soit vrais confès et bien repentanz de ses péchiez, je li en donrai un beau don, le plus bel qui onques fust donez par bouche d’erbier ; quar je li donrai si beau don qu’il porra dormir en prez, en rivières, en forez, en larriz[2], et en montaignes, en valées, en boschaiges d’une part et d’autre.
Ge di premièrement que boz ne le mordra, coluervre ne le poindra, serpent ne l’adesera, tarente[3] ne l’aprocbera, escorpion mal ne li fera. Ge di que por péchié qu’il face ne morra desconfès, por mengier envenimé que mal ne li fera puis qu’il aura la dame des herbes. Venez donc avant, et priez à Dieu tuit et toutes qu’il la vos doint véoir et esgarder, que ce soit au preu de vos âmes et au profit de voz
