Mès orandroit quanqu’an terre ai.
Sanz retenir riens qui soit née,
Guerpuis sans nule demorée,
En l’onor Dieu, qui tot[1] cria,
Le siècle et tout quanqu’il i a,
Et le déable et l’acointence
Guerpis sanz nule demorance. »
Li bons péchierre à tant se drece ;
Tot en plorant mult tost s’adrece
Vers une église Nostre-Dame :
Si li commande cors et âme.
En l’église entre sanz demore :
Laienz gémist et laienz plore ;
Laienz se bat et laienz veille ;
Laienz fet-il tante merveille
N’est nus qui réciter le sache.
Ses cheveuz tret, ses cheveuz sache.
Son vis despièce et s’esgratine,
Son piz débat[2] et sa poitrine,
Et à terre souvant s’estant.
Théophilus à rien n’entent
Fors à prier la douce Dame
Qu’il daint avoir merci de s’âme.
« Mère, fet-il, au Roi du ciel,
Qui plus ies douce que miel[3],
Qui plus ies douce et savoreuse,
Plus debonaire et plus piteuse,
Et plus souef et plus bénigne,
Et plus très seinte et plus très digne
Que ne porroit langue retrère,
A bone fin me deigne traire,
Ha ! mère au Roy qui tot cria,
Ainz nus de cuer ne te pria
A cui tu féisses le sort[4].
Dame an cui toute doçorz sort,
Sacrée Virge debonère,
Ne sai que dire ne que fère
Se ta douçor ne me regarde.
Page:Rutebeuf - Oeuvres complètes, recueillies par Jubinal, tome II, 1839.djvu/303
Apparence
Le texte de cette page a été corrigé et est conforme au fac-similé.
296
NOTES