Le grant Seingnor, qui tot cria,
Et madame seinte Marie ;
A haute voiz plorant, s’escrie :
« Venez avant, et toz et totes ;
A nuz genoz et à nuz cotes
Le douz Seingnor glorefiez,
Qui por nos fu crucefiez
Et qui tant est piteux et doz
Qu’il nos deingna rachater toz
Du cler rosé et du cler sanc
Qui dégouta de son saint flanc ;
Venez avant, seingnor et frère,
Glorefiez la douce mère
Au douz Seingnor qui tot cria,
Qui de nos touz tel merci a
Que par sa grant miséricorde
A son douz Fil toz nos acorde.
Venez avant, venez véoir
La grant douceur et le pooir
De la poissans Dame célestre ;
Venez avant, et clerc et prestre ;
Venez avant, et cler et lai,
Venez avant sans nul délai
La merveillant merveille oïr
Dont touz nos devons resjoïr.
Venez avant, petit et grant,
Venez véoir com est engrant
La mère Dieu, la débonère,
De péchéors de péchié trère[1] ;
Venez loer sanz nul séjor,
A jointes mains et nuit et jor,
La mère au Roi qui tant cria,
Qui à son Fil merci cria
Por racorder cest péchéor.
Venez véoir en quel fréor
La mère Dieu déable a mis ;
Venez véoir com annemis
Est engingniez et decéuz.
En ses las iert cis las chéuz,
- ↑ Ms. 6987. Var.
Venés la mère Diu loant,
Qui sait par amour debonère,
Le péchéor, etc.
