Mès cele tost l’en a fors mis
Qui n’oblie onques ses amis.
Venez véoir le riche tret
Que la mère Dieu si a tret :
Au déable a fet tel eschec
Que ce qu’il tenoit en son bec
A-il lessié par fine[1] force.
La mère Dieu, de qui est or ce,
Jeue si bien quant ele deingne,
Par un seul tret le jeu gaaingne.
Maint gieu perdu a gaaingnié,
Et s’a maint bon tret enseingnié
A ceus qui à lor jeu l’atraient.
Mult tost arrière s’en retraient
Li déable quant il la voient.
A cest chétif ici avoient
Par lor guile guilée s’âme ;
Mès, dès qu’au jeu vint Nostre-Dame,
I. si bon tret li ensengna
Quanqu’ot perdu regaaingna.
Dès que son bon corage vit
Si soutivement son jeu porvit
Qu’il retrouva par .i. seul tret
Quanqu’il avoit devant mestret.
« Venez véoir sanz délaiance
Com grant chose est de pénitance
Et comme ele a grant efficace ;
Venez véoir com a grant grâce
Et comme est douce au Sauvéor[2]
Chaude lerme de péchéor ;
Venez véoir la chaude lerme
Com frutefie à l’âme, et germe
Bone semance et bone graine ;
Venez véoir com l’âme a graine
Et comme elle en a grant profit ;
Venez véoir com desconfit
L’âme l’ordure de péchié.
Vos qui souvant avez péchié,
Chaudes lermes plorez souvant,
Page:Rutebeuf - Oeuvres complètes, recueillies par Jubinal, tome II, 1839.djvu/319
Le texte de cette page a été corrigé et est conforme au fac-similé.
312
NOTES
